Ved Høgskulen på Vestlandet (HVL) er det ledig ei stilling som stipendiat innan barnehageforsking ved Fakultet for lærarutdanning, kultur og idrett (FLKI).
Vi søkjer etter ein sosialt engasjert og motivert ph.d.-kandidat. Stillinga i barnehageforsking er ei forskarstilling som skal gi ein lovande forskarrekrutt moglegheit til fagleg utvikling relevant for kunnskap om barn og barnehage i eit perspektiv av berekraftige framtider. Stillinga skal styrke kunnskapsgrunnlaget for grunn-, etter- og vidareutdanningar ved FLKI og barnehageforsking, og for barnehage- og kultursektoren sitt arbeids- og organisasjonsliv. Arbeidsstad er lagt til miljøet ved BARNkunne – Senter for barnehageforsking, campus Bergen, der også Forskarskulen NORBARN inngår. Senteret utgjer eit tverrvitskapleg kunnskapsmiljø for forsking, formidling og undervisning i barnehagelærarutdanning, masterutdanning og utdanning på doktorgradsnivå. Senteret er også involvert i barn sitt liv i eit utvida kultur- og arbeidsliv og knyter band og nettverk både regionalt, nasjonalt og internasjonalt. Stillinga inngår i ei langsiktig strategisk satsing på forsking relevant for barnehagar, lokalmiljø, kulturorganisasjonar og familiar med barn.
Stilling som stipendiat har fullført forskarutdanning fram til doktorgrad som mål, og er ei rekrutteringsstilling som skal bidra til eit aktivt forskingsmiljø ved Høgskulen på Vestlandet. Miljøet arbeider i dag strategisk for ein plan om ein framleis satsing på framifrå forsking fram mot 2038. Miljøet driv BARNkunne – Senter for barnehageforsking. Senteret er finansiert frå Forskningsrådet (2018 – 2028). Miljøet er vertskap for forskarskulen NORBARN, som blei etablert i 2023. Forskarskulen NORBARN opnar for problematikk som er spesielt relevant for norsk og nordisk barnehagesektor. Avhengig av kandidaten sin faglege kompetanse vil stillinga også knytast til eit av institutta ved fakultetet, campus Bergen.
Lengd på stillinga
Varigheita på stipendiatstillinga er 3 år (01.01.27 – 31.12.29). Om ønskjeleg kan fakultetet vurdere å forlengje stipendiatperioden til fire år (01.01.27–31.12.30) der 25 % av tida er karrierefremjande arbeid ved eit av institutta til fakultetet. Om stipendet blir forlenga til fire år, vil karrierefremjande arbeid bli fordelt over alle åra.
Ansvars- og arbeidsområde:
Stipendiaten skal arbeide med problemstillingar innan forskingsfeltet barn, barndom og barnehage, i eit perspektiv av berekraftige framtider. Vi søkjer eit originalt og gjennomførbart prosjekt med tydeleg problemstilling, som knyter seg til arbeidsområdet under.
Stillinga er knytt til pågåande prosjekt i miljøet om vatn og vasslandskap. Prosjektet skal bidra til ny kunnskap om kyst-, marine- og/eller elvesamfunn si immaterielle kulturarv knytt til vatn. Prosjektet kan også knytast til ecological/water literacy.
Vi søkjer prosjekt som utviklar praksisbasert kunnskap om det som skjer i barnehagen og i samspelet mellom barnehage og lokalsamfunn, gjennom samskaping på tvers av generasjonar og mobilisering av immateriell kulturarv. Prosjektet kan undersøkje kva rolle nye digitale, multimediale og teknologiske verkemiddel spelar i slikt arbeid, og kan leggjast opp som casestudier i lokale kulturarvs- og forvaltningskontekstar, til dømes kyst-, marin- og elvkulturarv. Relevante metodiske innfallsvinklar kan vere kroppsleggjorde, leikbaserte og deltakande metodar, historieforteljing og historieskaping, og samskapingssyklusar med verkstad, utprøving, refleksjon og tilpassing. Arbeidsområdet er relevant for FN sitt berekraftsmål 4, 6, 11 og 14.
Det er forventa at stipendiaten fullfører ein ph.d.-avhandling innan tre år, basert på artiklar som er publiserbare i vitskaplege tidsskrift. Det er òg forventa at stipendiaten deltek aktivt intellektuelt og kollegialt i miljøet. Dette kan innebere å vere medforfattar, å dele arbeid undervegs i seminar, verkstad og på konferansar, og det inneber å respondere konstruktivt på initiativ frå andre og sjølv vere ein drivar i miljøet.
Du kan lese meir om miljøet på denne nettsida: BARNkunne – Senter for barnehageforskning - Høgskulen på Vestlandet (hvl.no).
Du kan lese om Forskarskulen NORBARN her: Forskerskolen NORBARN - Høgskulen på Vestlandet (hvl.no)
Kvalifikasjonskrav:
Ved tilsetting av stipendiat vil det bli lagt vekt på følgjande kriterium:
- Fullført mastergrad i barnehagekunnskap/pedagogikk/utdanningsvitskap/kultur/kommunikasjon og mediefag eller fagkombinasjonar innanfor samfunnsvitskaplege eller humanistiske fagområde.
- Karakter A eller B på masteroppgåva.
- Prosjektskildring og kvaliteten på denne.
- Forskingsrelevant erfaring, slik som publisering og deltaking i forskingsprosjekt. Søkjaren skal ha relevant faglig profil i forhold til stillinga og ein sterk fagleg bakgrunn frå tidlegare studium.
Mastergradsoppgåva må vere levert til vurdering innan søknadsfristen, og mastergraden må vere godkjent seinast fire veker etter søknadsfristen.
Ved elles like vilkår vil søkjarar med mastergrad nyare enn 5 år bli føretrekte.
Kjennskap til barnehagesektor, folkehelse eller kultur er relevant og ein føremon, men ingen føresetnad.
Prosjektet inneber deltaking i internasjonale nettverk, der engelsk er naudsynt. Difor må den som blir tilsett meistre engelsk. Det er ein føremon om kandidaten snakkar og skriv norsk eller eit anna skandinavisk språk. Høgt etisk medvit er sjølvsagt for stillinga.
Personlege eigenskapar
Vi ser etter ein kandidat som kan balansere visjonar med gjennomføringskraft. Stipendiatstillinga er ei rekrutteringsstilling som skal bidra til eit aktivt forskingsmiljø ved BARNkunne, og ei langsiktig satsing for framifrå forsking. Difor må kandidaten kunne bidra til eit inkluderande og internasjonalt arbeidsmiljø. Personlege eigenskapar som vil bli tillagt vekt er evne til å arbeide kreativt, sjølvstendig, kollegialt og strukturert. Søkjaren må kunne vise til gode samarbeidsevner, inkludert evne til å arbeide saman med andre om felles mål. Evne til å engasjere andre og til god kommunikasjon er ynskjeleg.
Prosjektskisse
Søkjaren må leggje ved ei prosjektskisse på inntil fem sider, inkludert referansane som er brukt i skissa. Skissa bør gjere greie for problemstilling og forskingsspørsmål, teoretisk forankring, metode og datamateriale, framdriftsplan for tre år, etiske vurderingar og forventa bidrag. Der det er føremålstenleg, kan datagenerering skje i tilknyting til aktivitetane i dei prosjekta stillinga er kopla til. Den førebels prosjektskildringa vil nyttast med tanke på vurdering av kvalifikasjonane til kandidaten og vil ikkje vere den endelege prosjektskildringa. Prosjektskissa dannar grunnlag for dialog med rettleiingsteamet, og prosjektet vil bli revidert i samarbeid med rettleiarane etter tilsetting. Prosjektskissa skal slik vere eit solid grunnlag for å utvikle ei fullstendig prosjektskildring etter tilsetting som stipendiat.
Doktorgradsprogrammet
Stillinga føreset opptak på ph.d.-programmet "Studiar av danning og didaktiske praksisar" og deltaking i Forskarskulen NORBARN. Nærmare informasjon om doktorgradsprogrammet finn ein HER. Søknad om opptak til doktorgradsprogrammet skal fyrst sendast etter ei eventuell tilsetjing. Ein skal normalt søkje om opptak til ph.d.-utdanning innan tre (3) månader etter oppstart, jf. Forskrift for graden ph.d. ved HVL § 2-4.
Stipendiatstillinga er ei rekrutteringsstilling som skal bidra til eit aktivt forskingsmiljø ved Høgskulen på Vestlandet. Dersom det er tillagt pliktarbeid til stipendiatstillinga, skal pliktarbeidet utførast ved Høgskulen på Vestlandet. Det er vidare ein føresetnad at den som vert tilsett, har arbeidsplassen sin ved Høgskulen på Vestlandet, Campus Bergen i tilsetjingsperioden.
Her finn du informasjon om ph.d.-programmet og opptakskriterier: Ph.d.-studiet Studiar av danning og didaktiske praksisar (SDDP)
Karriereplan
Den som blir tilsett, skal i samarbeid med instituttet utarbeide ein karriereplan som spesifiserer den kompetansen stipendiaten skal byggje opp. Det skal setjast kompetansemål både for doktorgradsarbeidet og eventuelt anna karrierefremjande arbeid som blir lagt til stillinga. Stipendiaten vil ha tilgang til karriererettleiing.
Anna karrierefremjande arbeid kan til dømes omfatte undervisning og undervisningsrelatert arbeid, opparbeiding av norskkunnskapar, bidrag i forskingsfellesskap, samarbeid med offentlege eller private aktørar med meir.
Bakgrunnssjekk
For aktuelle stillingar gjennomfører HVL bakgrunnssjekk av søkjarar i samarbeid med ekstern leverandør for å verifisere opplysningar som går fram av tilgjengelege dokument. Bakgrunnssjekk skjer alltid med samtykke frå kandidaten, og tilsetjing i desse stillingane føreset gjennomført bakgrunnssjekk. Aktuelle søkjarar vil få nærare informasjon om dette.
Korleis søkje på stillinga?
Send søknad og CV ved å klikke på knappen merka ”Søk stillinga” på denne sida.
Vi gjer merksam på at søknadar vert vurdert ut frå den informasjon som er lagt inn i www.jobbnorge.no ved søknadsfristens utløp. Det er søkjar sitt eige ansvar å sørge for at alle relevante vedlegg er lagt inn innan fristen, herunder masteroppgåva/hovudfagsoppgåva og inntil 5 vitskaplege arbeid som de ønskjer å ha med i vurderinga, fullstendig publikasjonsliste, prosjektskildring, attestar og vitnemål. Dersom vitnemål, karakterutskrift eller anna dokumentasjon ikkje er på eit skandinavisk språk eller engelsk, må søkjar sjølv laste opp attesterte omsetjingar. Dersom vedlegga overskrid 50 MB må dei komprimerast før opplasting eller leggjast ved som lenkje.
Søkjarar med utanlandsk utdanning må i tillegg dokumentere at utdanninga samsvarar med norsk bachelor-, master- eller ph.d.-grad. Sjå www.hkdir.no for meir informasjon om vurdering av høgare utdanning.
HK-dir tilbyr automatisk godkjenning for enkelte gradar frå utvalde land. Dersom utdanninga til søkjaren er dekka av ordninga med automatisk godkjenning, vil det vera tilstrekkeleg å leggje ved dokumentasjon på dette. Du kan lese meir om ordninga med automatisk godkjenning her.
Vi gjer merksam på at søknad om vurdering gjennom den ordinære godkjenningsordninga til HK-dir kan ta tid. Du bør difor sende søknad om godkjenning så raskt som mogeleg når du veit at du vil søkje på stillinga. Dersom du ikkje har fått svar frå HK-dir innan søknadsfristen, legg du ved dokumentasjon frå HK-dir om at dei har motteke søknaden din.
Søkjarar til vitskaplege stillingar vert vurdert av eit sakkunnig utval. Vurderinga skjer på grunnlag av dokumentert kompetanse, inntil 5 vitskaplege arbeid. På grunnlag av utvalet si innstilling, vil aktuelle søkjarar bli kalla inn til intervju. Tilsetjinga skjer i tilsetjingsutvalet ved gjeldande fakultet.
Søknadane vert sendt elektronisk til det sakkunnige utvalet. Søknadar kan ikkje sendast på e-post til enkeltpersonar ved høgskulen.
Vi tilbyr:
- Gode pensjons-, forsikrings- og låneordningar i Statens pensjonskasse
- Spennande fagmiljø med moglegheit for kompetanseheving – og utvikling
- Moglegheiter for trening i arbeidstida
- Regionale, nasjonale og internasjonale nettverk
- Eit ope, internasjonalt og inkluderande arbeidsmiljø
- Eit aktivt og ansvarleg rettleiarteam med både senior og yngre rettleiarar
Stillinga som stipendiat vert løna i stillingskode 1017 Stipendiat. Vidare opprykk skjer etter tenesteansiennitet i stillinga.
Frå løna vert det trekt 2 % innskot til Statens pensjonskasse. Den som blir tilsett, må rette seg etter dei retningsliner som til ei kvar tid gjeld for stillinga.
Generell informasjon:
Vi gjer merksam på at unntak frå den offentlege søkjarlista blir handsama etter reglane i Offentleglova. Søkjarar som har bede om slikt unntak, blir varsla dersom ønskje ikkje vert teke til følgje.
Den statlege arbeidsstyrken skal i størst mogleg grad spegle mangfaldet i befolkninga. Det er difor eit personalpolitisk mål å oppnå ei balansert alders- og kjønnssamansetjing, rekruttere personar med minoritetsbakgrunn, personar med nedsett funksjonsevne og hol i CV.
Tilsetjing skjer under føresetnad av at du får innvilga arbeids- og opphaldsløyve (må vurderast individuelt).
Høgskulen på Vestlandet er underlagt eksportkontrollforskrifta. Forskrifta kan komme til bruk i behandlinga av søknadane.
Kontaktpersonar ved Høgskulen på Vestlandet er:
1) Elin E. Ødegaard, Professor, senterleder for BARNkunne, eeo@hvl.no
2) Oded Ben-Horin, Prodekan forskning FLKI, obh@hvl.no
Inkludere, utfordre og samhandle
Les meir på våre heimesider.