Miljøterapeut i 100 % prosjektstilling

Om stillinga

Austrheim kommune har fått innvilga prosjektmidlar til Grønt arbeid, eit lågterskeltilbod innan psykisk helse- og rusfeltet. Vi søkjer derfor etter ein miljøterapeut i 100 % prosjektstilling, med helse- eller sosialfagleg kompetanse. Prosjektstillinga har ei varigheit på inntil fire år.

Grønt arbeid er eit arbeids- og aktivitetsretta tilbod innan psykisk helse- og rusfeltet. Tilbodet har ei recoveryorientert grunnhaldning og byggjer på prinsippa frå ABC for god psykisk helse: aktivitet, fellesskap og meining.

Psykisk helse- og rusfeltet er organisert under helseeininga i Austrheim kommune. Tenesta består av fagleiar og psykiatrisk sjukepleiar, psykolog, arbeidsleiar for arbeids- og aktivitetstilbodet og helsefagarbeidar. Vi samarbeider tett med andre kommunale tenester, NAV og spesialisthelsetenesta.

Vi arbeider for å styrkje tilbodet om tidleg hjelp og utvikle lågterskeltilbod for ei utvida brukargruppe. Grønt arbeid skal vere ein møteplass og ein base innan psykisk helse- og rusfeltet, der arbeid, aktivitet og individuell oppfølging blir kombinerte for å fremje meistring, fellesskap og meiningsfull aktivitet.

Vi ønskjer at du som medarbeidar skal vere ein ressurs og pådrivar for endring og utvikling.

Arbeidsoppgåver

• Delta i utvikling av tilbodet ved Grønt arbeid saman med arbeidsleiar og medarbeidargruppa
• Gje tilbod til brukargruppe med behov for individuelle tilpasninger, både individuelt og i gruppe
• Deler av stillinga er knytt opp til eit einetiltak i kommunen med oppfølging i privat heim
• Buoppfølging 
• Medikamenthandtering 
• Styrke den einskilde sin medverknad og sjølvråde
• Samarbeid med pårørande
• Tverrfagleg samarbeid med interne og eksterne samarbeidsparter

Kvalifikasjonskrav

• Vi søkjer etter deg som har autorisasjon som vernepleiar eller sjukepleiar. Søkjarar med autorisasjon som helsefagarbeidar vil òg bli vurderte. Andre med helse-, sosialfagleg eller pedagogisk utdanning på yrkesretta- eller høgskulenivå kan òg vere aktuelle.

  Det er ein fordel om du har interesse for, og gjerne arbeidserfaring frå, psykisk helse- og rusfeltet.

• Gode munnlege og skriftlege norsk kunnskapar
• Førarkort klasse B
• Gyldig politiattest må leggjast fram før tilsetting
   

Kven ser vi etter?

Vi ser etter deg som er imøtekomande og tillitsskapande, og som har evne til å byggje gode relasjonar med menneske i ulike livssituasjonar. Du ser heile mennesket og har forståing for korleis livssituasjon, utfordringar og omgivnader påverkar den einskilde.

Du er trygg i rolla di, tek ansvar og møter menneske med tolmod, respekt og ro – også i krevjande situasjonar. Samstundes er du ein naturleg lagspelar som samarbeider godt med andre, men som òg kan arbeide strukturert og sjølvstendig.

Vi ønskjer at du er fleksibel, løysingsorientert og bidreg positivt til eit godt arbeidsmiljø. Personlege eigenskapar vil bli tillagde stor vekt.

Vi tilbyr

• Eit positivt og utviklingsorientert arbeidsmiljø 
• Stor variasjon i arbeidsoppgåver, og høve til fagleg utvikling
• Tilsetjing i samsvar med gjeldande lov- og avtaleverk
• God pensjonsordning gjennom KLP
• Nytilsettopplæring og oppfølging

Heim til Austrheim

Vi bygger framtida i opne landskap med eit ope sinn. Her får du moglegheita til å jobbe i eit inspirerande miljø, omkransa av natur og engasjerte kollegaer. Bli ein del av eit fellesskap som verdset trivsel, samarbeid og utvikling - både for innbyggjarane og for deg som arbeidstakar.

Vi skal vere ein trygg og inkluderande arbeidsplass for alle, uavhengig av kjønn, alder, etnisk bakgrunn, religion, livssyn, funksjonsevne, seksuell orientering og kjønnsidentitet. Hos oss jobbar vi aktivt med mangfald, inkludering og likestilling. Mangfald bidrar til auka innovasjon, berekraft, effektivitet, læring og trivsel. Vi vil at dei som jobbar hos oss skal spegle samfunnet i Austrheim.

Video: