Vil du vere med å forme framtidas heimetenester i Vindafjord?

Å kunne leve eit trygt og godt liv heime handlar om å meistre kvardagen og få god hjelp når det trengst. Når fleire vil trenge oppfølging heime i åra framover, blir det viktig å utvikle tenester som gir tryggleik, kontinuitet og hjelp tilpassa den enkelte.

Som einingsleiar får du forme korleis heimetenestene i Vindafjord skal møte desse behova. Saman med tre avdelingsleiarar og medarbeidarane får du byggje vidare på kompetansen i tenestene og utvikle nye løysingar. Innsikt i kvardagen til innbyggjarane, dei pårørande og medarbeidarane blir utgangspunktet for å finne gode måtar å organisere arbeidet, bruke kompetansen og samarbeide på.

Heimetenestene omfattar indre sone, ytre sone og dagtilbod for eldre, kvar med sin avdelingsleiar. Eininga har 59 tilsette fordelte på 44 stillingsheimlar og ei økonomisk ramme på om lag 53 millionar kroner i 2026.

Einingsleiaren rapporterer til kommunalsjef for helse og omsorg og inngår i leiargruppa for området. Arbeidsstaden er på rådhuset i Ølen, med jamleg nærvær og tett kontakt med avdelingane.

Dine viktigaste ansvarsområde

• Ha heilskapleg ansvar for fag, personal og økonomi, med vekt på forsvarlege tenester, god ressursbruk og drift innanfor vedtekne rammer.
• Støtte og følgje opp dei tre avdelingsleiarane, og samle leiarteamet om felles retning og prioriteringar.
• Leggje til rette for eit godt arbeidsmiljø der medarbeidarane får bidra, bruke kompetansen sin og utvikle seg fagleg.
• Sikre kvalitet og pasienttryggleik gjennom systematisk oppfølging og forbetringsarbeid.
• Vidareutvikle organisering og arbeidsmåtar, og gjennomføre endringar saman med medarbeidarar, tillitsvalde og vernetenesta.

• Styrkje samanhengen i kommunen sitt tenestetilbod gjennom samarbeid på tvers og medverknad frå brukarar og pårørande.

Kven ser me etter?

Me søkjer ein leiar med relevant høgare utdanning, gjerne innan helse- og sosialfag, og leiarerfaring med personalansvar og økonomioppfølging. God forståing for helse- og omsorgstenester er viktig. Leiarutdanning og erfaring frå kommunale tenester er ein fordel. Stillinga krev god munnleg og skriftleg framstillingsevne på norsk.

Bakgrunnen din kan vere frå heimetenester eller andre delar av helse- og omsorgstenestene. Me legg vekt på erfaring med å utvikle medarbeidarar, prioritere ressursar og gjennomføre forbetringar saman med andre. Me ønskjer også søkjarar som vil ta steget frå avdelingsleiing til eit større leiaransvar.

Som leiar er du lyttande og tydeleg, skaper tillit og gir rom for faglege innspel. Du samlar folk om felles prioriteringar, tek avgjerder og følgjer opp. Evna til å sjå behova i eiga eining i samanheng med kommunen sitt samla tilbod blir viktig for å lukkast.

Ei leiarrolle med breidde, påverknad og meining

Her får du kombinere nærleik til menneske og fag med høve til å påverke eit heilt tenesteområde. Dei tre avdelingsleiarane blir sentrale samarbeidspartnarar, både om det som krev merksemd i kvardagen, og om løysingar som skal fungere over tid.

Gjennom leiargruppa for helse og omsorg får du kollegaer å dele erfaringar og drøfte felles utfordringar med. Stillinga gir høve til å utvikle deg vidare som leiar og bidra til felles løysingar som får betydning utover eiga eining.

Vindafjord kommune tilbyr løn etter avtale og gode pensjons- og forsikringsordningar.

Fram til søknadsfristen vil alle søkjarar bli handsama konfidensielt. Me gjer merksam på at det etter søknadsfristen vil bli utarbeidd ei offentleg søkjarliste. Opplysningar om søkjarar kan bli offentleggjorde sjølv om det er bede om unntak frå den offentlege søkjarlista. Dersom eit slikt ynske ikkje blir teke til følgje, vil søkjaren bli varsla før den offentlege søkjarlista blir utarbeidd.